All in a Nutshell

All in a Nutshell – Jack Hannah rejissyorligida yaratilgan Donald Duck haqidagi qisqa metrajli animatsion film. Walt Disney Productions tomonidan suratga olingan. Dastlab, 1949-yilda RKO Radio Pictures tomonidan Technicolorda chiqarilgan.

All in a Nutshell
Rejissyor(lar)	Jack Hannah
Prodyuser(lar)	Walt Disney
Hikoya	Bill Berg Nick George
Rollarda	Clarence Nash Dessie Flynn Jimmy MacDonald
Bastakor(lar)	Oliver Wallace
Animator(lar)	Bill Justice Judge Whitaker Bob Carlson Jack Boyd
Studiya(lar)	Walt Disney Productions
Distribyutor	RKO Radio Pictures
Chiqarilgan sanasi	1949-yil 2-sentyabr
Davomiyligi	6:50 minut
Mamlakat	AQSh
Til	inglizcha

Syujeti

Donald Duck yoʻl boʻyida joyashgan ulkan yongʻoq shaklidagi uy va „Donʼs Nut Butter“ deb nomlangan yongʻoq sariyogʻining egasidir. Donaldning har tongi yongʻoqni qobiqdan ajratib olish va bir chelak yongʻoqni sariyogʻ tayyorlash uskunasiga solish bilan boshlanadi. Sariyogʻ tayyorlaydigan mashinani ishga tushiradi va bunker ostidan oʻtayotgan yongʻoqlar bilan bankalarni toʻldiradi. Eng soʻngida Donald bankalarni yorliqlab, qopqogʻini yopadi va ularni javonlarga qoʻyib, „Bular issiq shirinlik kabi tez sotiladi“, deb oʻziga oʻzi izoh berib qoʻyadi. Shu orada Donald mashinasida yongʻoqlar tugaganligini koʻradi va koʻproq yigʻish uchun bogʻga chiqib ketadi.

Donald orqa eshikdan chiqayotib, Chip va Dalening qish mavsumi uchun yongʻoq yigʻish maqsadida kelayotganligini payqab qoladi va ular yongʻoq saqlayotgan daraxtning qaysi ekanligini bilish maqsadida jarayonni kuzatib turadi. Soʻng, daraxtda kimdir bor yoʻqligini bilish uchun taqillatadi. Hech qanday javob boʻlmagach, katta teshik ochib, chelakni toʻldirib oladi va keyingi yogʻ ishlab chiqish jarayonini qayta boshlash uchun xursandchilik bilan oʻz uyiga qaytib keladi. Donald uyga ketayotganida yongʻoqlarning bir nechtasi toʻkilib qoladi. Chip va Dale yongʻoqlari nima sababdan yer boʻylab sochilib ketganligini bilish uchun ularning izidan yurishadi va Donaldning ulkan yongʻoq shaklidagi uyini koʻrib qolishadi. Dastlab, Chip va Dale uyni haqiqiy yongʻoq deb oʻylashadi va hayajondan oʻzlarini yoʻqotadilar. Birozdan soʻng es-hushlari tiklanib, ulkan yongʻoqning magʻzini olish uchun turli yoʻllarni izlashadi. Nihoyat, Dale yongʻoqning tepa qismiga tosh otadi va tosh baland ovoz chiqaradi. Ovoz Donaldning sergaklanishiga sabab boʻladi.

Tosh ish bermagach, Chip va Dale yongʻoqning tepasiga chiqmoqchi boʻlishadi va moʻriga koʻzlari tushadi. Moʻridan pastga qarab, Donaldning ish jarayonini kuzatib turishadi. Jarayon ularga maqul boʻlgach, Donaldga sezdirmasdan pastga tushishadi. Shu paytda Chip va Dale javondagi oʻzlarining yongʻoqlarini koʻrib qoladilar va nima sababdan yongʻoqlari kamayib qolganini anglaydilar. Chip va Dale Donalddan oʻch olmoqchi boʻladilar va javon tepasidagi bankalarni uning boshiga tashlab yuboradilar. Natijada, Donald hushini yoʻqotadi.

Voqealar soʻngida, Chip va Dale vaziyatdan foydalangan holda Donaldni asirga olishadi. Donald uygʻonganida, oʻzini Chip va Dalening daraxti ichida, qoʻllari bogʻliq holda ekanligini koʻradi. Qoʻshimchasiga Donaldning barcha asbob-uskunalarini olib kelib, ulardan Chip va Dale sariyogʻ tayyorlashda foydalanayotgan boʻlishadi. Bu holatni koʻrib, Donald gʻazablanadi, ammo, qoʻllari bogʻliqligi sababli hech ish qila olmaydi. Chip va Dale Donaldni eski yongʻoq daraxti yoniga olib borishadi va zambarakka oʻqlab, daryoga otib yuborishadi. Donaldni daryoga tushguncha kuzatib turadilar. Soʻng, Chip va Dale yongʻoq poʻstidan yasalgan dubulgʻalarini yechib, gʻalabani nishonlaydilar.