Fargʻona davlat universiteti

Fargʻona davlat universiteti (ruscha: Ферганский государственный университет; 1930–1991-yillarda Fargʻona pedagogika instituti) – ilmiy va pedagog kadrlar tayyorlaydigan oliy oʻquv yurti.

Fargʻona davlat universiteti

Xalqaro nomi	Fergana State University
Ilgarigi nomi	Fargʻona pedagogika instituti
Asos solingan sanasi	1991-yil 1-mart
Rektori	Bahodirjon Shermuhammadov
Joylashuvi	Oʻzbekiston
Veb-sayti	fdu.uz

Tarixi

Oʻzbekiston hukumatining qaroriga muvofiq 1991-yil 1-martda Fargʻona pedagogika instituti (1930-yil 1-mayda asos solingan) negizida Fargʻona davlat universiteti tashkil etilgan.

Universitetda 11 fakultet (matematika, fizika, texnika, tabiiyot, jismoniy tarbiya, iqtisodiyot, ijtimoiy-gumanitar mutaxassisliklar, pedagogika va madaniyat, oʻzbek filologiyasi, xorijiy filologiya, huquq va maʼnaviyat asoslari, kadrlar malakasini oshirish va qayta tayyorlash), 50 kafedra, 34 oʻquv va 10 ilmiy laboratoriya, 14 kompyuter sinfi, 2 akademik litsey, internat litsey, biznes maktabi, „Nilufar“ teatr studiyasi, sanatoriyprofilaktoriy, 8 ochiq va 4 qishki yopiq sport inshooti bor; kutubxonasida 800 mingga yaqin asar saqlanadi (2004).

Kutubxona qoshida 100 oʻrinli oʻquv zali, fakultetlararo 2 filiali hamda internet tarmogʻiga ulangan kompyuter zali mavjud. Universitet 26 yoʻnalish boʻyicha [matematika, amaliy matematika va informatika, fizika, kasbiy taʼlim, biologiya, kimyo, tuproqshunoslik, ekologiya va tabiatdan foydalanish, geografiya, mehnat taʼlimi, jismoniy tarbiya va jismoniy madaniyat, chaqiriqqacha harbiy tayyorgarlik, iqtisodiyot (sohalar boʻyicha), tarix, psixologiya, sotsiologiya, oʻzbek filologiyasi, slavyan filologiyasi, romangerman filologiyasi, boshlangich taʼlim va sport tarbiyaviy ish, ijtimoiy madaniy faoliyat, musiqiy taʼlim, xalq ijodiyoti, tasviriy sanʼat va muhandislik grafikasi, milliy istiqlol gʻoyasi, huquq va maʼnaviyat asoslari, yurisprudensiya] bakalavrlar, 16 mutaxassislik boʻyicha (differensial tenglamalar, ehtimollik nazariyasi va matematik statistika, matematika fanini oʻqitish metodikasi, yarim oʻtkazgichlar va dielektriklar fizikasi, nazariy fizika, fizika fanini oʻqitish metodikasi, noorganik kimyo, zoologiya, botanika, odam va xayvonlar fiziologiyasi, jismoniy tarbiya va jismoniy madaniyat, tarmoqlar iqtisodiyoti, Vatan tarixi, sotsiologik tadqiqot usullari, lingvistika, adabiyotshunoslik) magistrlar tayyorlaydi.

Universitetda 12 yoʻnalish boʻyicha aspirantura va 2 yoʻnalish boʻyicha doktorantura hamda 2003 yildan milliy tillar (oʻzbek tili) boʻyicha Birlashgan ixtisoslashgan ilmiy kengash faoliyat koʻrsatadi. 2003–2004-oʻquv yili universitetda 7059 talaba taʼlim oldi, 611 oʻqituvchi, jumladan, 55 fan doktori va professor, 167 fan nomzodi va dotsent ishladi.

Universitet faoliyati B.Otaqulov, M. Qoraboyev, A. Oʻrinov, M. Ahmedov, R.Rasulov, M. Abdullayev, A. Mamajonov, Yo. Toirov, A. Gʻofurov, A. Muhammadiyev, Gʻ. Hamidov, A. Krdirov, A. Mahmedov, Sh. Xonkeldiyev kabi professoroʻqituvchilar nomi bilan bogʻliq. Universitetda ilmiy jurnal va „Fargʻona universiteti“ gazetasi nashr etiladi. 2004 yilgacha universitet 70 mingdan ortiq mutaxassis tayyorladi.

Rektorlari

Ismi	Izoh	Yil
M.Q.Qoraboev	fizika-matematika fanlari doktori, professor	1991-1996
E.A.Abdullaev	fizika-matematika fanlari doktori, professor	1996-1999
Oʻrinov Axmadjon Qoʻshaqovich	fizika-matematika fanlari doktori, professor	1999-2004
Ziyayev Muzaffar Qutluqovich	iqtisod fanlari doktori, professor	2004-2005
M.H.Ahmedov	biologiya fanlari doktori, professor	2005-2013
Tashmatov Shuhrat Xamrayevich	iqtisod fanlari doktori, professor	2013-2016
A.X.Xaitbaev	kimyo fanlari doktori	2016-2018
Maksudov Rashid Hailevich	texnika fanlari doktori	2018-2021
Bahodirjon Shermuhammadov	pedagogika fanlari doktori, professor	2021-hozirgacha