Ipak yoʻli turizm va madaniy meros xalqaro universiteti

„Ipak yoʻli“ turizm va madaniy meros xalqaro universiteti
Xalqaro nomi	„Silk Road“ International University of Tourism and Cultural Heritage
Turi	Universitet
Asos solingan sanasi	2018
Rektori	Aziz Abduhakimov
Fakultetlar	1 ta
Talabalari	2600+
Bakalavriat	4 yil
Magistratura	2 yil
Doktorantura	Mavjud, 3 yil
Fan doktorlari	10+
Professorlari	3
Oʻqituvchilari	73
Manzili	17-uy,, Samarqand, Oʻzbekiston
Kampusi	Smart Campus
Veb-sayti	univ-silkroad.uz

„Ipak yoʻli“ turizm va madiny meros xalqaro universiteti – Xalqaro turizm sohasida professional kadrlar tayyorlash tizimini tashkil etish, ilmiy-tadqiqot ishlari va ijodiy ishlarni olib borish boʻyicha tashabbuslarni amaliy roʻyobga chiqarish, Shanxay hamkorlik tashkilotiga aʼzo davlatlarning tarixiy, madaniy-gumanitar aloqalarini yanada rivojlantirish maqsadida tashkil etilgan oliy taʼlim muassasasi.

Tarixi

Oʻzbekiston Respublikasi Prezidentining qaroriga muvofiq, 2018-yil 28-iyunda tashkil topgan^[1].Prezidentning 2021-yil 30-oktabrdagi qaroriga muvofiq „Ipak yoʻli“ turizm xalqaro universiteti „Ipak yoʻli“ turizm va madaniy meros xalqaro universiteti etib qayta nomlandi.

Faoliyatining asosiy yoʻnalishlari

turizm sohasida yuqori malakali professional kadrlarni milliy va xalqaro taʼlim standartlariga muvofiq tayyorlashni taʼminlash;

taʼlimning tegishli yoʻnalishlari va mutaxassisliklari boʻyicha oʻquv-metodik adabiyotlarni yaratish, talabalar va mutaxassislarni jalb qilgan holda fundamental va amaliy ilmiy tadqiqotlar olib borish, turizm sohasida taʼlim tizimiga xorijiy taʼlim muassasalari tajribasini joriy qilish;

turizm sohasida kadrlar tayyorlash tizimini takomillashtirish va modernizatsiya qilishga qaratilgan yangi taʼlim dasturlarini ishlab chiqish va joriy etish;

istiqbolli yosh bitiruvchilarni chet el oliy taʼlim muassasalariga va ilmiy-tadqiqot markazlariga magistratura hamda doktoranturada oʻqishga muntazam ravishda yuborish;

taʼlim va ilmiy faoliyatning ishlab chiqarish faoliyati bilan uzviy integratsiyalashuvi uchun shart-sharoitlar yaratish;

turizm sohasi subyektlari mutaxassislarini qayta tayyorlashni va ularning malakasini oshirishni tashkil etish;

turistik faoliyatni va turizm sohasida yoʻlovchilarni tashish faoliyatini amalga oshirish;

respublika va xorijiy taʼlim muassasalari hamda ilmiy-tadqiqot markazlari bilan hamkorlikni, ularning mutaxassis hamda ekspertlarini oʻqitish, ilmiy tadqiqotlar oʻtkazish jarayonlariga jalb qilish orqali rivojlantirish, xalqaro ilmiy-amaliy konferensiyalar, seminarlar va simpoziumlar tashkil etish.

Maqomi

Universitet oliy taʼlim muassasasi – yuridik shaxs shaklidagi Oʻzbekiston rezidenti hisoblanadi, alohida mol-mulkka, mustaqil balansga ega, oʻz majburiyatlari boʻyicha tasarrufidagi pul mablagʻlari va mol-mulk bilan javob beradi. Universitetda oʻquv-metodik rahbarlik va taʼlim jarayonini yuritish ilgʻor innovatsion hamda ilmiy-pedagogik texnologiyalardan foydalangan holda Turizm va madaniy meros vazirligi tomonidan taʼminlanadi. Universitet Turizm va madaniy meros vazirligi tashkiliy tuzilmasiga kiradi. Turizm va madaniy meros vaziri ayni vaqtda universitetning bosh menejeri hisoblanadi. Universitet rektori universitet professor-oʻqituvchilarining tarkibi toʻliq shakllantirilgunga qadar universitetning vasiylik kengashi tomonidan saylanadi, keyinchalik esa universitet ustavida belgilanadigan tartibda professor-oʻqituvchilar tarkibi tomonidan yopiq ovoz berish orqali saylanadi. Universitetda xalqaro turizm sohasida kadrlar tayyorlash boʻyicha oʻqitishning kredit tizimi qoʻllanadi. Universitetda oʻqish oʻzbek, rus va ingliz tillarida olib boriladi, bakalavriatda Oʻzbekiston Respublikasi davlat taʼlim standartlari talablarini hisobga olgan holda ikkita chet tili: birinchisi – ingliz (fransuz, nemis) tili, ikkinchisi – Shanxay hamkorlik tashkilotining rasmiy tillaridan (rus, xitoy) biri oʻqitiladi. Universitet bitiruvchilariga Oʻzbekistonda oliy taʼlim toʻgʻrisidagi hujjat deb eʼtirof etiladigan, belgilangan namunadagi diplom beriladi.

Qabul

Universitetga abituriyentlarni qabul qilish Oʻzbekiston Respublikasi taʼlim muassasalariga oʻqishga qabul qilish boʻyicha Davlat komissiyasi hamda universitetning onlayn qabul qilish tizimi tomonidan belgilangan tartibda yiliga 2 marotaba amalga oshiriladi. Abituriyentlarni universitet bakalavriatiga qabul qilish test sinovlarini oʻtkazish orqali amalga oshiriladi. Chet el fuqarolari universitet bakalavriatiga belgilangan qabul kvotasidan tashqari suhbat oʻtkazish orqali toʻlov-kontrakt asosida qabul qilinadi. Universitetga talabalarni bakalavriat taʼlim yoʻnalishlari va magistratura mutaxassisliklari boʻyicha qabul qilish kvotalari soni turizm sohasida mehnat resurslariga boʻlgan talab prognozidan va Shanxay hamkorlik tashkilotiga aʼzo davlatlarning maqsadli buyurtmalaridan kelib chiqqan holda, Universitetning Vasiylik kengashi tomonidan belgilanadi. Ilgʻor, eʼtirof etilgan xalqaro imtihon tizimlari (TOEFL, IELTS, CEFR, SAT General, SAT Subject va boshqalar) sertifikatlariga ega boʻlgan abituriyentlarga tegishli fanlardan belgilangan tartibda eng yuqori ball beriladi va kelgusida ular ushbu fanlar boʻyicha test sinovlaridan ozod qilinadi.

Taʼlim yoʻnalishlari

Kunduzgi

#	Shifr	Taʼlim yoʻnalishi nomi
1	60212200	Madaniy meros obyektlarini asrash
2	60220400	Arxeologiya
3	60411200	Menejment (tarmoqlar va sohalar boʻyicha)
4	60411700	Logistika (turizm logistikasi)
5	61010500	Gid hamrohligi va tarjimonlik faoliyati: ingliz tili
6	61010400	Turizm (faoliyat yoʻnalishlari boʻyicha)^[2]

Sirtqi

#	Shifr	Taʼlim yoʻnalishi nomi
1	60411200	Menejment: turizm binesini boshqarish
2	60411200	Menejment: ommaviy tadbirlar menejmenti
3	60411800	Menejment: mehmonxonalarni boshqarish
4	61010400	Turizm (faoliyat yoʻnalishlari boʻyicha)^[3]

Masofaviy

#	Shifr	Taʼlim yoʻnalishi nomi
1	60410800	Menejment
2	61010100	Turizm va mehmondoʻstlik

Magistratura yoʻnalishlari

#	Shifr	Taʼlim yoʻnalishi nomi
1	70211004	Muzeyshunoslik, tarixiy-madaniy ob’yektlarni konservatsiya qilish, taʼmirlash va saqlash
2	70220401	Arxeologiya
3	70411201	Menejment (madaniy, tabiiy va aralash merosni boshqarish)
4	70411701	Logistika (turizm)
5	71010401	Turizm (faoliyat turlari boʻyicha)
6	71010402	Ijodiy sanoat

Manbalar

↑ „“Ipak yoʻli” turizm xalqaro universitetini tashkil etish toʻgʻrisida“. Xalq soʻzi. 2019-yil 26-yanvarda asl nusxadan arxivlangan. Qaraldi: 2019-yil 26-yanvar.
↑ „Oliy ta’lim muassasalari boʻyicha oʻtish ballari“. Davlat test markazi. 2020-yil 31-oktyabrda asl nusxadan arxivlangan. Qaraldi: 2020-yil 27-oktyabr.
↑ „Oliy ta’lim muassasalari boʻyicha oʻtish ballari“. Davlat test markazi. 2020-yil 30-oktyabrda asl nusxadan arxivlangan. Qaraldi: 2020-yil 27-oktyabr.

[1] „“Ipak yoʻli” turizm xalqaro universitetini tashkil etish toʻgʻrisida“. Xalq soʻzi. 2019-yil 26-yanvarda asl nusxadan arxivlangan. Qaraldi: 2019-yil 26-yanvar.

[2] „Oliy ta’lim muassasalari boʻyicha oʻtish ballari“. Davlat test markazi. 2020-yil 31-oktyabrda asl nusxadan arxivlangan. Qaraldi: 2020-yil 27-oktyabr.

[3] „Oliy ta’lim muassasalari boʻyicha oʻtish ballari“. Davlat test markazi. 2020-yil 30-oktyabrda asl nusxadan arxivlangan. Qaraldi: 2020-yil 27-oktyabr.

[1]

[2]

[3]