Qarshi davlat universiteti Filologiya fakulteti

Qarshi davlat universiteti filologiya fakulteti – Qarshi davlat universitetining fakultetlaridan biri. 1977-yilda Qarshi davlat pedagogika instituti tarkibidagi fakultet sifatida foliyatini boshlagan. Fakultetda 8 ta bakalavriat, 2 ta magistratura yoʻnalishlari mavjud. Fakultet binosi M-39 yoʻlining yoqasida joylashgan. 800 nafar talabalar tahsil oladi.

Qarshi davlat universiteti filologiya fakulteti

Asos solingan sanasi	1956-yil (Filologiya boʻlimi sifatida) 1977-yil (Filologiya fakulteti sifatida)
Rektori	Dilmurod Nabiyev
Dekani	Baxtiyor Rizayev
Talabalari	800
Joylashuvi	Qashqadaryo viloyati , 180100 , Oʻzbekiston
Tili	oʻzbek tili
Veb-sayti	Fakultet veb-sayti

Tarixi

Fakultet 1956-yilda Qarshi davlat pedagogika institutining Tarix-filologiya fakultetining filologiya boʻlimi sifatida faoliyatini boshlagan. 1977-yili Tarix-filologiya fakultetlari mustaqil 2 ta fakultetga boʻlinib, oʻzbek filologiyasi fakultetiga aylantirilgan. Fakultetga rus yoʻnalishlar ham qoʻshilgach, fakultet nomi „Filologiya fakulteti“ nomiga oʻzgartirilgan.

Taʼlimi

Fakultetda bakalavriat taʼlim bosqichi uchun „Filologiya va tillarni oʻqish (oʻzbek)“, „Ona tili va darajasi(rus)“, „Folklorshunoslik va shevashunoslik“, „Kutubxona-axborot ishlari“, „Amaliy filologiya“, „Matnshunoslik va adabiy manbashunoslik: oʻzbek tili“ yoʻnalishlari, magistratura taʼlim bosqichi uchun esa, „Lingvistika (oʻzbek tili)“, „Lingvistika (rus tili)“ yoʻnalishlari mavjud.

Fakultetga oʻqish uchun kirish imtihonlari har yili Bilim va malakalarni baholash agentligi tomonidan ona tili va adabiyoti hamda chet tillari boʻyicha oʻtkaziladi.

2021-yilda fakultet universitetning asosiy binosidan, universitet akademik litseyining sobiq binosiga koʻchirilgan. Fakultet binosining yonida talabalar turar joyi ham mavjud boʻlib, 100 oʻringa moʻljallangan.

Oʻzbekiston Respublikasi Prezidentining 2022-yil 15-iyundagi „2022/2023 oʻquv yili uchun davlat oliy taʼlim muassasalariga oʻqishga qabul qilishning davlat buyurtmasi parametrlari toʻgʻrisida“gi F-60-sonli farmoyishiga muvofiq, fakultetning 5 ta taʼlim yoʻnalishiga 150 ta kvota ajratilgan.

Kafedralar

Fakultet „Oʻzbek mumtoz adabiyoti“, „Oʻzbek tilshunosligi“, „Rus tili va adabiyoti“, „Oʻzbek tili va adabiyoti“, „Yangi oʻzbek adabiyoti va adabiyot nazariyasi“ kabi 5 ta kafedraga boʻlinadi.

Oʻzbek mumtoz adabiyoti kafedrasi

Kafedra 1964-yilda „Adabiyotshunoslik“ kaderasi sifatida faoliyatini boshlagan. Qarshi davlat universiteti rektori Dilmurod Nabiyevning 2023-yil 17-may kunidagi buyrugʻiga asosan, „Adabiyotshunoslik“ kaderasi oʻrnida „Oʻzbek mumtoz adabiyoti“ kafedrasi tashkil qilingan. Kafedra oʻqituvchilari tomonidan 1 ta darslik va 5 ta oʻquv qoʻllanmalari fakultet uchun darslik sifatida joriy etilgan.

Kafedra mudiri – Nafas Shodmonov, filologiya fanlari doktori, professor. Oʻzbekiston Respublikasi davlat mustaqilligining 33 yilligi munosabati bilan, Oʻzbekiston Respublikasi Prezidentining 2024-yil avgustdagi farmoniga muvofiq, „Doʻstlik“ ordeni bilan mukofotlangan.

Ilmiy kengash

Kafedraning qoshida 2018-yilda Ilmiy kengash oʻz faoliyatini boshlagan. Oʻzbekistonlik 150 ga yaqin ilmiy tadqiqotchilar ilmiy kengashda filologiya fanlari doktori va filologiya fanlari boʻyicha falsafa doktori ilmiy darajalari uchun dissertatsiyalarini yoqlagan.

Oʻzbek tilshunosligi kafedrasi

Oʻzbek tilshunosligi kafedrasi 1956-yilda institut tarkibida faoliyatini boshlagan. 1963-yildan 1964-yilgacha kafedraga oʻzbek adabiyoti kafedrasi qoʻshilganligi sababli, kafedra shu 2 yil mobaynida „Oʻzbek tili va adabiyoti kafedrasi“ deya nomlangan. Kafedarada har yili „Oʻzbek tilshunosligining dolzarb masalalari“ ilmiy toʻplami chop etiladi.

Kafedra mudiri – Nilufar Yuldosheva, filologiya fanlari nomzodi, dotsent.

Rus tili va adabiyoti kafedrasi

Kafedra 1996-yili institutning rus tilshunosligi kafedrasi, rus va chet el adabiyoti kafedrasi, rus tili va adabiyoti oʻqitish metodikasi kafedrasi, rakultetlararo rus tili kafedralarini qoʻshilishidan tashkil topgan.

Kafedra mudiri – Dilfuza Pardayeva, filologiya fanlari boʻyicha falsafa dotori, dotsent.

Oʻzbek tili va adabiyoti kafedrasi

Kafedra 2019-yil 10-dekabrdagi universitetning kengash qaroriga muvofiq tashkil etilgan.

Yangi oʻzbek adabiyoti va adabiyot nazariyasi kafedrasi

Kafedra fakultetdagi eng yosh kafedra hisoblanadi. 2023-yilda universitet kengashi qarori bilan tashkil etilgan. Kafedra mudiri – Gulnoza Ernazarova, filologiya fanlari doktori, professor.

Hamkorligi

Fakultet oʻz ilmiy doirasida Belgorod davlat milliy-tadqiqot universiteti, Moskva davlat lingvistika universiteti, Nijniy Novgorod davlat universiteti, Turkiyaning Niyde Oʻmer Halisdemir universiteti, Oʻzbekiston milliy universiteti, Oʻzbekiston davlat jahon tillari universiteti, Toshkent davlat pedagogika universiteti, Samarqand davlat universiteti, Buxoro davlat universiteti, Termiz davlat universiteti, Jizzax davlat universiteti, Rossiya fanlar akademiyasi huzuridagi Turkologiya boʻlimi, Chelyabinsk davlat universiteti, Turkiya Respublikasi fanlar akademiyasining Turkologiya boʻlimi, Alisher Navoiy nomidagi Til va adabiyot instituti, Rossiya—Tojikiston davlat universitetlari bilan ilmiy hamkorlikni yoʻlga qoʻygan.

Rus tili markazi

Fakultetda tahsil oluvchi talabalar uchun „Rus tili markazi“ faoliyati yoʻlga qoʻyilgan. Markaz o'z faoliyatini 2023-yilning 10-aprelida boshlagan. Markazda professor-oʻqituvchilar rahbarligida darslar tashkil etiladi. Markaz byudjetdan tashqari mablagʻlar hisobiga moliyalashtiriladi.

Talabalar oshxonasi

Fakultetda talabalar oshxonasi barpo etilgan boʻlib, 2023-yil oktyabr oyida qurilishi boshlangan. Oʻzbekiston Respublikasi Qurilish va uy-joy kommunal xoʻjaligi vazirligi maʼlumotlariga koʻra, oshxona 848 975 015 soʻm miqdoridagi mablagʻga qurib bitkazilgan.